O‘zbekistonda inson qo‘li tegmagan, tabiati deyarli asl ko‘rinishida saqlanib qolgan juda ko‘p ajoyib hududlar bor. Bunday so‘lim go‘shalar haqida kam sonli odamlar biladi va u yerga ko‘pchilik bormagan. Shunday hududlardan biri Tuzkon ko'lidir. Go‘zal manzarali maskan baliq va ko‘chmanchi qushlarning sevimli makoniga aylangan. Tuzkon ko'lining qirgʻoqlarida qamish, turanga, chakan, yulg‘un kabi o‘simlilklardan iborat zich chakalakzorlarni ham koʻrish mumkin. U yerda o‘nlab turdagi qushlar, jumladan, baliqchi qushlar, qarqaralar, o‘rdaklar, haqqushlar va boshqalar chakalakzordan boshpana topadilar. Siz ushbu trek davomida quyosh botishini kuzatasiz va Tuzkon ko'lining haqiqiy dengiz kabi maftunkor manzaralarini ko'rishingiz mumkin.