Yoz jaziramasini his etmaydigan Zomin tog‘lari. Bu yerdagi tog‘ o‘rmonlari shifobaxsh archazorlar bilan qoplangan. Tog‘ hududida ko‘plab dorivor o‘simliklar o‘sadi. Eng hayratlanarlisi, bu dov-daraxtlar jazirama issiqni ko‘rishmaydi hisob. Bahoriy durkunlikni yoz bo‘yi saqlab turishadi va avgust oylarida kuz fasliga kirishadi. Zomin tog‘lariga «O‘zbekiston Shveytsariyasi» deya ta’rif beriladi. Bu bejiz emas albatta. Dengiz sathidan 2500 metr balandlik, qalin archazorga burkangan tog‘lardan tushayotgan muzdek zilol suv va shifobaxsh buloqlarning o‘zi jonga orom beradi. Ajoyib landshaftlar va toza tog‘ havosi, flora va faunaning xilma-xilligi - bularning barchasi Zomin tog'larida. Zomin davlat qo‘riqxonasidagi “Qizil kitob”ga kiritilgan hayvon va qushlar, o‘simliklarni o‘zida mujassam qilgan bioxilma-xillik, toza havo, ziloldek buloq va Sangzor daryosiga borib qo‘shiladigan, baland tog‘ qorlaridan erib kelayotgan muzdek irmoq suvi, har qanday inson kayfiyatiga ijobiy ta’sir ko‘rsatishi shubhasiz.