Ugom tog’ tizmasida balandligi 80-100 metr atrofida bo’lgan 8 ga yaqin doimiy va mavsumiy sharsharalar mavjud. Ushbu sharsharalarning faqat 4 tasi o’zining ajoyib ko’rinishiga ega. Dengiz sathidan 1750 metr yuqorida joylashgan, balandligi 75 metr bo‘lgan Obipar sharsharasi avvaliga baland qoyadan ikkita alohida shox bo‘lib pastga oqadi va ikkisi birlashib tor daraga tushadi. Sharsharagacha 4 kilometrlik yo‘l va 900 metrlik ko‘tarilishning aksar qismi toshli so‘qmoqlar bo‘ylab o‘tadi. Yo‘l-yo‘lakay bir nechta g‘orchalarni ko‘rib ketish mumkin. Sharsharaga yetgandan so’ng afsuski, hech qaysi kamera tabiatning bu go‘zalligini inson ko‘zlaridek tasvirlab berolmaydi. U uzoqdan ko‘rinishi bilan insonni o‘ziga tortadi. Suv zarralarining ulkan qoyadan pastga tushishini tomosha qilish, uning ovozidan bahra olish insonga ajib zavq beradi.

Sur'atlar muallifi: Ziyadkhon Karaxodjaev, Marat Nadjibaev