2508 metr balandlikdagi Kapirtosh cho’qqisiga ko'tarilish uchun marshrut qiyin emas, lekin uzoq (25 km), yaxshi jismoniy tayyorgarlikni talab qiladi. Ijtimoiy tarmoqda Kapirtoshning rasmlari kam. Borlari ham yaxshi taassurot bermaydi. Ommaviy marshrut emas, kamchilik sayohatchilar boradigan joy. Chunki masofa uzoq, bosib o‘tiladigan balandlik ancha yuqori. Safarning avvalidanoq yuqoriga ko‘tarilish boshlanadi. 1555 metr balandlikdagi Terskay dovonigacha 3,5 kilometr bosiladi, yo‘lning bir qismi o‘rmon ichidan o‘tadi. Dovonda biroz dam olgach yo‘lni davom ettiramiz. So’ng dovondan biroz pastga tushamiz. Pastda sharsharalarga boy Qulasa (Kulosya) daryosi va darasi ko‘rinib turadi. Yo‘lning bu qismi ancha tekis bo‘lgani uchun maza qilib yursa bo‘ladi. U yerdan biz ko‘zlagan cho‘qqi ham ko‘rinib turadi. Cho‘qqidagi panoramani til bilan ta’riflash mushkul. Atrofdagi Chotqol, Piskom, Ugom, Qorjontov tizmalarining baland cho‘qqilari Buyuk Rassom tomonidan go‘zal tarzda chizib qo‘yilganga o’xshaydi, bularning barchasi shunchaki ajoyib.